Friday, 12 May 2017





K-VIS BLOG
BENKI Kuu ya Tanzania imefuta leseni ya biashara ya Benki ya Kijamii ya Mbinga, Mbinga Community Bank Plc, kuanzia leo Mei 12, 2017.
Taarifa ya Benki Kuu ya Tanzania iliyosambazwa kwenye vyombo vya habari leo asubuhi imesema, kufuatia kufutiwa leseni kwa benki hiyo kuanzia leo Mei 12, 2017 shughuli zote za kibenki nazo pia zimesitishwa.
Aidha, Benki Kuu ya Tanzania imeiweka Mbinga Community Bank Plc chini ya ufilisi na kuiteua Bodi ya Bima ya Amana kama mfilisi kuanzia leo Mei 12, 2017
Uamuzi huu umechukuliwa baada ya Benki Kuu ya Tanzania kujiridhisha kuwa Mbinga Community Bank Plc ina upungufu mkubwa wa mtaji na ukwasi kinyume na matakwa ya Sheria ya Mabenki na Taasisi za Fedha ya wmaka 2006 na kanuni zake.
“Upungufu huu wa mtaji na ukwasi unahatarisha usalama wa sekta ya fedha, na kwamba kuendelea kwake kutoa huduma za kibenki kunahatarisha usalama wa amana za wateja,” taarifa hiyo imeeleza.
Aidha, Benki Kuu ya Tanzania imeuhakikishia umma kuwa “itaendelea kulinda maslahi ya wenye amana katika mabenki kwa lengo la kuleta ustahimilivu katika sekta ya fedha.”
Benki Kuu ya Tanzania imechukua uamuzi wa kuifunga benki hiyo kwa mujibu wa kifungu cha 56(1) (g), 56(2) (a), (b) na (d), 58(2) (i), 11(3) (j), 61(1) na 41(a) cha Sheria ya Mabenki na Taasisi za Fedha ya mwaka 2006.
Aidha, Benki Kuu ya Tanzania imewataka wenye amana, wadai na wadaiwa wa iliyokuwa Mbinga Community Bank Plc kuwa wavumilivu wakati Mfilisi atakapokamilisha taratibu na kwa wakati muafaka atawafahamisha wenye amana, wadai na wadaiwa utaratibu wa malipo ya madai, ulipaji wa madeni na taratibu nyingine zitakazohitajika kwa mujibu wa sheria.
Hatuahiyo ya BoT, imekuja siku nne tu tanguichukue hatua kama hiyo, kwa kuifutia leseni benki ya FBME kwa sababu kama hizo.



Reactions:

0 comments:

Post a Comment