Friday, 3 March 2017


Katibu Mtendaji wa Bodi ya Filamu Tanzania Joyce Fisso.(PICHA YA MAKTABA) 

NA ABUU KIMARIO
KATIBU Mtendaji wa Bodi ya Filamu Tanzania Joyce Fissoo amesema serikali iko mbioni kukamilisha sera ya maendeleo ya filamu ambayo inategemewa kuwa mwarobaini wa changamoto zinazoikabili sekta hiyo yenye kutoa ajira kwa vijana wengi nchini.
Kauli ya kiongozi huyo wa taasisi ya Serikali yenye dhamana ya kusimamia maendeleo ya sekta ya filamu nchini aliitoa wakati akijibu swali la mtangazaji wa kipindi cha Tunatekeleza, Esha Muhiddin, kinachorushwa na runinga ya TBC1.
Kwenye mahojiano hayo mtangazaji alitaka kujua kama sheria Na. 4 ya Filamu na Michezo ya Kuigiza ya mwaka 1976 inakidhi mahitaji ya sasa ambapo Bi. Fissoo alikiri kuwa sheria hiyo ina upungufu kwenye baadhi ya maeneo ambayo ni ya muhimu kwa ustawi wa tasnia ya filamu na uchumi wa nchi kwa ujumla.

Bi. Fissoo alieleza moja ya upungufu wa sheria hiyo ni kushindwa kuwalazimisha watayarishaji wa filamu kutoka nje ya nchi kutoa mgao wa faida wanazozipata baada ya kutumia mandhari za Tanzania kwenye filamu zao. Upungufu huo umesababisha nchi kukosa mapato ambayo yangeweza kutumika kwenye miradi mbalimbali ya maendeleo.
Upungufu mwingine wa sheria hiyo ya mwaka 1976 ni kuiona sekta ya filamu kama chanzo cha burudani ambacho hakina thamani kwenye soko la bidhaa na huduma. Mtazamo huu umepelekea wasanii wa filamu kushindwa kupata kipato wanachostahili.

“Baada ya kutambua mapungufu hayo Serikali ya awamu ya tano imedhamiria kukamilisha sera ya maendeleo ya filamu nchini ambayo itazaa sheria na kanuni zitakazokuwa tiba ya changamoto zinazoikabili sekta ya filamu” Bi Fissoo aliongeza.
Mbali na ujio wa sera ya maendeleo ya filamu nchini Bi. Fissoo aligusia maeneo mengine ambayo serikali ya awamu ya tano kupitia Wizara ya Habari, Utamaduni, Sanaa na Michezo na Bodi ya Filamu Tanzania yamefanikiwa kuyapatia ufumbuzi ikiwa ni pamoja na kutoa mafunzo kwa wadau zaidi ya elfu moja kwenye mikoa mbalimbali nchini.
Maeneo mengine ni kuiboresha Bodi ya Filamu Tanzania tokea mwezi Julai 2016. Kwa sasa Bodi ina mamlaka kamili na muundo mpya unaowezesha kusimamia majukumu mapya yaliyoongezwa ili kuhakikisha sekta ya filamu inakuwa na mchango wa kutosha kwenye ukuaji wa uchumi.
Katibu Mtendaji huyo wa Bodi ya Filamu pia alitoa msimamo wa serikali kuhusu tabia ya watayarishaji wa filamu za kizawa kuzigawa filamu zao kwenye sehemu mbili (part 1&2) kuwa ni kitendo kischokuwa na nia njema na kina lengo la kuhadaa walaji wa filamu za kitanzania. Alibainisha tabia hiyo kuwa moja ya sababu za kushusha soko la filamu za kitanzania ndani na je ya nchi.
Bi Fissoo amewaasa wadau wa sekta ya filamu nchini kujitokeza kwa wingi kutoa mawazo yao ili kuboresha sera ya maendeleo ya filamu nchini pale watakapo hitajika.
Reactions:

0 comments:

Post a Comment