Thursday, 30 March 2017

MWENYEKITI wa chama cha mapinduzi (CCM) tawi la  Mparange na mjumbe wa serikali ya kijiji cha Ikwiriri Kaskazini ,wilayani Rufiji mkoani Pwani, Michael Lukanda,ameuawa kwa kupigwa risasi ya kichwani na watu wasiojulikana.
Watu hao  wanadaiwa kuwa ni wawili waliotumia usafiri wa bodaboda ambapo mmoja walimpiga risasi mwenyekiti huyo wakati akiingia nyumbani kwake kisha walitokomea.
Tukio hilo limefuatia baada ya mwenyekiti wa kitongoji cha Mparange kijijini hapo, Bakari Mpanawe kunusurika kifo baada ya kupigwa risasi ya tumboni na mkononi machi 19. 2017
Kamanda wa polisi wa mkoa wa Pwani, Onesmo Lyanga, amekiri kutokea kwa tukio hilo usiku wa kuamkia machi 29, 2017.
Alisema tukio hilo ni la tano kutokea ndani ya mwezi huu ,likihusisha uhalifu wa kutumia silaha za moto .
Kamanda Lyanga ,alieleza kwamba wanaendelea kuwasaka watu waliohusika kufanya matukio hayo ili waweze kuchukuliwa hatua za kisheria .
Kwa upande wake ,katibu  wa CCM wilayani Kibiti, Zena Mgaya ,alisema hali ya kiusalama sio shwari katika baadhi ya maeneo wilaya  ya Kibiti na Rufiji kijumla.
Alisema hali hiyo inajenga hofu kwa viongozi kupitia CCM ambao baadhi yao wameamua kukimbia miji  kwa kuhofia kuuawa .
Zena alibainisha kwamba,matukio ya aina hiyo yanawasababishia  kuishi pasipo na amani  na wanaccm kuhofia kugombea nafasi mbalimbali za uongozi katika chaguzi zijazo za chama na serikali za vijiji na vitongoji.
Alihamasisha wanaccm kugombea nafasi mbalimbali bila kuweka uoga  kwani kifo kinapangwa na mungu .
Nae diwani wa kata ya Dimani ,Ramadhani Manyema ,alisema kuna wenyeviti wa vitongoji na vijiji vinne wamekimbia miji  yao wakihofia maisha yao .
Alisema kukimbia maeneo yao ya kazi kumetokana na kutokea matukio ya hivi karibuni ambapo  kuna Mwenyekiti wa kijiji cha  Nyambonda pamoja na wenyeviti wa vitongoji viwili na mtendaji wa kijiji hicho kupigwa risasi .
Maeneo mengine ni Jaribu Mpaka ambako OC CID na mgambo wa maliasili walipigwa risasi na kufariki  na huko eneo la Kifugo tendaji alijeruhiwa kwa kupigwa risasi .
Manyema alieleza ,hali ya kiusalama sio shwari hivyo wanatilia mashaka kama watafanikiwa katika zoezi la uchaguzi wa chama .
Aliliomba jeshi la polisi mkoani Pwani ,lishuke vijijini  ambapo hali sio nzuri pasipo kukaa mjini pekee .
Akizungumza katika ziara yake wilayani Kibiti,katibu  wa CCM mkoani Pwani, Hassan Mtenga aliwataka wazazi na walezi kuwafuatilia nyendo watoto wao kwani wapo vijana wanaotumika kwenye matukio ya kiuhalifu .
Mtenga alisema ifikie hatua ya watu kubadilika kwa kuacha kuficha  wahalifu kisa  ni ndugu ,jamaa ama marafiki .
Taarifa kutoka ofisi ya Mkuu wa Mkoa wa Pwani, Mhandisi Evarist Ndikilo iliyopatikana Machi 30 kwa vyombo vya habari imepiga marufuku usafiri wa bodaboda baada ya saa 12 jioni katika wilaya yote ya Rufiji mkoani humo.
Kwa mujibu wa taarifa hiyo ikimnukuu Mkuu wa Mkoa wa Pwani Mhandisi Ndikilo imesema, "Kuanzia Machi 29, 2017, usafiri wa boda boda wilayani Rufiji utaanza saa 12 asubuhi hadi saa 12 jioni." alisisitiza na kwamba agizo hilo litabakia hivyo hivyo hadi itakapotangazwa vinginevyo.
Aidha Mhandisi Ndikilo ametoa wito kwa wananchi kutoa taarifa za watu wanaowashuku kujihusisha na vitendo hivyo kwa vyombo vya dola.





Reactions:

0 comments:

Post a Comment